Nú eru daprir dagar hjá Samfylkingunni. Allir sjá að eina glóran upp á framtíðina að gera væri að slíta stjórnarsamstarfinu við Flokkinn - áður en vinstri sinnaðir stuðningsmenn og Evrópusinnar missa þolinmæðina endanlega.
En þar sem formaður Samfylkingarinnar baðar sig í sólinni í Sjarm-el-Sjeik er sú hugsun ógeðfelld að hrekjast af fyrsta farrými utanríkisráðuneytisins aftur í almenning stjórnarandstöðu. Því mun þessi stjórn lafa þar til sósíaldemókratar í Fylkingunni hafa náð völdunum af þessum formanni - sem getur ekki hugsað sér að slíta notalegu stjórnarsamstarfi við Flokkinn og áhugaverðum samtölum við Al-Assad bara til að Steingrímur verði utanríkisráðherra - eða jafnvel Guðni.
Stjórnarslit þýða ekki endilega að boðað verði til nýrra kosninga, heldur aðeins að Flokkurinn myndi nýja ríkisstjórn með lysthafendum og það er nóg framboð á mannskap í ráðherraembætti.
Flokkapólitík snýst ekki um hvað sé þjóðinni fyrir bestu. Í næstu kosningum gæti Samfylkingin unnið stærsta kosningasigur Íslandssögunnar. En kjarkinn vantar til að bíða færis.
2 ummæli:
Þráinn, skamm.
Það er ljótt, að spá harindum og óáran, svona lóðbeint ofaní núverandi eymingjatíð.
Það er ljótt að hræða með ,,ljóta karlinum" eða kerlingunni, þegar lándslýður er að eiga við uppvakninga peningastofnana í formi Hávaxta-Skottu og Gjaldþrots-Móra.
Ekki og ég meina EKKI hóta stjórn með ISG í stól forsætisráðherra, tilhugsunin ein dugir til að frómum Rvíkingum, sem upplifðu hana í stól Borgarstjóra/stýru, setjist að kaldur feigðar-hrollur, af þeirri stærðargráðu og alvarleik, sem þjóðsögur okkar fram setja í sögum af uppvakningum, draugum og þessháttar skuggabúandi lýð.
Brrrrr brrrr
Nafnlausi Bjarni
alias
Miðbæjaríhaldið
Von 101 Rvík
Það er satt, Bjarni, að um fleiri minnuga menn en okkur mun fara kaldur feigðarhrollur þegar við minnumst þess að þessi póltíska spegilmynd Davíðs Oddssonar var einu sinni borgarstjóri í Reykjavík - við takmarkaðar vinsældir.
Skrifa ummæli