laugardagur, 5. júlí 2008

Skuggi Skuggason í Skuggasundi. Opið bréf til ríkisstjórnar Íslands

Ég hélt að sá tími myndi aldrei koma að ég þyrfti að fara á mótmælafund til að biðja íslensk stjórnvöld að stilla sig um að ata hendur sínar saklausu blóði. En það átti fyrir mér að liggja að fara í mótmælastöðu upp í Skuggasund, þar sem dómsmálaráðherra hefur skrifstofu. Ég er ekki að spauga. Dómsmálaráðuneyti Íslands stendur við Skuggasund!


Sá úrskurður að flytja úr landi - frá eiginkonu og nýfæddu barni - saklausan mann sem á yfir höfði sér að verða drepinn í heimalandi sínu er ógnvænlegur. Ekki síst vegna þess að huggun mín og margra annarra síðustu hálfa öld hefur verið sú, að þótt Flokkurinn sem mótað hefur íslenskt þjóðfélag víli ekki fyrir sér að tortryggja, uppnefna, njósna um, hefta eða eyðileggja starfsframa þeirra sem þora að andmæla vilja hans séu menn samt ekki í beinni lífshættu. Með orðinu "uppnefna" á ég við það meiðyrði að kalla andstæðinga sína "kommúnista". Aðferð sem reyndist árangursrík í skammvinnu galdrafári McCarthys í Bandaríkjunum.

Nú er svo komið að Flokkurinn virðist ekki lengur víla fyrir sér að senda saklaust fólk í böðulshendur. Úr því að "Lebensraum" er orðið svona takmarkað á Íslandi vil ég gera stjórnvöldum það tilboð að flytja mig til Ítalíu og bjóða mig fram sem gísl í staðinn fyrir Paul Ramses; að hann geti fengið að sjá litla barnið sitt aftur, en ég víki í staðinn úr skugga hinnar helbláu handar.

Nýjasta hugsjón Flokksins er að leynileg lögregla fái "framvirkar rannsóknarheimildir". Sem sé heimildir til að rannsaka manneskjur eftir geðþótta - án þess að grunur liggi fyrir um að þær hafi gerst brotlegar við lög eða hafi lögbrot í hyggju! Ég veit ekki af hverju fólk kaus Flokkinn, en það var ekki til þess arna sem þjóðin veitti Samfylkingunni það tímabundna umboð sem hún hefur.

Ég mótmæli mannhatri og miskunnarleysi í nafni þeirra kynslóða sem að mér standa. Kynslóða sem hafa lifað og dáið frá landnámstíð í trú á frelsi og framtíð þessa lands og allra heimsins barna. Allar komu þær kynslóðir naktar í heiminn og enginn krafði þær um vegabréf til að fá að lifa. Farðu burt, Skuggi Skuggason í Skuggasundi. Farðu burt, helbláa hönd!

Virðingarfyllst,
Þráinn Bertelsson

Þetta bréf verður einnig birt sem bakþanki á baksíðu Fréttablaðsins mánudaginn 7. júlí.

14 ummæli:

Nafnlaus sagði...

Meðframbjóðandi og samflokksmaður Ramses í Kenýa heitir Raila Odinga. Í dag er hann forsætisráðherra landsins. Einhverra hluta vegna efast ég stórlega að hann sé mikið í því að drepa kollega sína.

Stjórnmálaástandið í Kenýa er í jafnvægi í dag - það gæti verið betra, en þar ríkir ekki ógnaröld.

Nafnlaus sagði...

,,Framvirk rannsókn".

,,Óhefðbundin yfirheyrsla".

,,Greiningardeild."

Skrauthvörf dylja ekki það sem að baki býr.

Þvert á móti.

Balzac.

Birgitta Jónsdóttir sagði...

Frábært bréf hjá þér Þráinn... vil svo bara minna á undirskriftarlistann fyrir Paul Ramses
http://www.thepetitionsite.com/1/PaulRamses

með björtum kveðjum
Birgitta Jónsdóttir

Nafnlaus sagði...

þegar og ef við losnum við hinn hlergefna Björn á eftir að taka mikið til í þeim undirstofnunum sem heyra undir hann og hann hefur ekki einusinni þurft að siga á landslíð td Stefán Eiríksson sem ekki nær yfirlögreguþjóninum Geirjóni í geirvörtur þótt með gullbryddað kasskeyti sé

Nafnlaus sagði...

Þetta of gott tilboð til þess að það sé hægt að hafna því!

Nafnlaus sagði...

Þakka þér fyrir góða grein Þráinn, ég hlakka til að lesa hana á prenti á mánudaginn!

Nafnlaus nr. 1: Ég þekki Paul Ramses persónulega en ég, ásamt manninum mínum, sé um kirkjustarf fyrir útlendinga í Hvítasunnukirkjunni.

Ég fékk ásamt 2. öðrum að tala við hann kvöldið áður en hann var sendur úr landi. Það sem hann sagði okkur um ástandið í landinu passar við það sem ég hef síðan lesið mér til um. Hann sagði okkur einnig að hans stjórnmálaflokk og Odinga hefði tekist að knýja fram aðild að ríkisstjórn. Þrátt fyrir það hafði hann góða ástæðu til að ætla að hann væri enn í mikilli hættu, hann var raunverulega hræddur um hvað myndi gerast ef hann yrði sendur aftur til Kenýa og hafði miklar áhyggjur af konu sinni og syni. Ástæðan er m.a. sú að lögreglan í héraðinu hans var að leita hans, ekki aðeins vegna stjórnmála afskipta hans heldur einnig vegna þess að hann átti að hafa fengið 6. milljónir sendar frá Íslandi þegar hann stjórnaði ABC í Kenýa og falið þær einhversstaðar, þetta er bull og vitleysa eins og Þórunn Helgadóttir hjá ABC getur staðfest, vegna þessa leitaði lögreglan m.a. af honum í miðstöð ABC.

Áður en hann flúði úr landi, hafði hann verið handtekinn og beittur ofbeldi og pyntaður af lögreglunni ásamt 24. öðrum karlmönnum, þetta gerðist 3. janúar. Vegna þessa hafði hann liðið miklar kvalir, líkamlega og sálarlegar og var hjá sálfræðingi á vegum Rauða Krossins vegna þess.

Hann var raunverulega hræddur um að vera sendur til baka og hann hafði raunverulegar ástæður fyrir ótta sínum. Hann kom ekki til Íslands að gamni sínu eða til að liggja á kerfinu. Hann kom til að hann og kona hans og sonur gætu lifað við öryggi. Hann vann fyrir þeim á veitingastað í Rvk. og þau leigðu sér íbúð sem þau borguðu sjálf af. Þau eru ekki eitthvað hyski sem eru hingað komin af því það er svo gaman að vera hérna! (ekki að þú hafir sagt það nafnlaus, en ég hef séð marga segja það og það gerir mig bálreiða, það gæti ekki verið fjarri sannleikanum!)

Vonandi varpaði þetta einhverju ljósi á aðstæður þeirra.

Kv. Kristín Jóna
(kristin_jonak(hja)yahoo.com

Nafnlaus sagði...

Smá viðbót:

Það eru alls ekki öll kurl komin til grafar í sambandi við þetta mál. Samskipti Útlendingastofnunnar við þau hjón og við aðra útlendinga sem við þekkjum til eru alls ekki hrein og bein. Það er mikið um dónaskap, lélega enskukunnáttu og hreinræktaða geðvonsku á þeirra "ágætu" stofnun. Ef að ekkert annað næst með þessu máli og þeirri miklu umfjöllun sem það hefur fengið en að Útlendingastofnun og stefna íslendinga í innflytjendamálum sé endurskoðuð væri það smá sigur.

Ég vona samt innilega að niðurstaðan verði önnur og meiri fyrir Paul, Rosemary og Fidel Smára.

kv. Kristín Jóna

Nafnlaus sagði...

Útlendingastofnun er að breytast í KGB skuggastofnun. Þar er möppudýrsaðferðum og hreinni og beinni mannvonsku beitt óhikað.

Fólki utan ESB er gert það erfiðara en andskotanum að fá aðgang að þessari útnára eyju lengst norður í nára.

Þetta er stefna Skugga Skuggasonar og Co. Og nú er Samfylkingin orðin partur af þessum óþvera. Ég kalla eftir Utanríkisráðherra hið snarasta núna. Ef það kemur ekkert nema þögnin út af þessu máli úr þeim ranni þá fara að renna tvær grímur á mig.

Nafnlaus sagði...

Ég var í Skuggasundi í gær og þar hélt hugað fólk frábærar hvatningaræður og neitaði að viðhalda þrælsótta þessarar þjóðar. Ég hélt að kalda stríðinu hefði lokið fyrir 15 árum síðan! Hvað er að þessum mönnum? Það vantar fleira gott fólk á þetta land. Nú eru ungar fjölskyldur að flýja græðgishyggjuna hér... geta ekki haldið íbúðum sínum nema með allt of mikilli vinnu. Þessir sem vinna í skúmaskotum og standa ekki fyrir máli sínu eru sannkallaðir skuggar, sem sjá aldrei neina heildarsýn og eru þ.a.l. hjartalausir.

Margrét

Nafnlaus sagði...

Sæll kæri mæstró Þráinn Bertelsson

... og þakka þér þúsund sinnum þúsund sinnum fyrir greinina um Paul hinn brottflutta og Skugga Skuggason, Flokkinn, og ofsóknir ,,höfðingjanna´´(púff!!!) gegn þessum vini mínum, sem ég kynntist í fyrra þegar hann var svaramaður Herberts eiginmanns Matthildar systurdóttur minnar í Bústaðakirkju hjá séra Pálma Matthíassyni.

Paul vann hjörtu okkar allra á brúkaupsdegi frænku, enda með afbrigðum geðugur og gáfaður maður. (Meira að segja móðir mín féll fyrir þessum flotta ,,diplómat´´frá Kenía - og slíkt gerist sko ekki á hverjum degi hjá maddömmunni!)

Ég bið og vona að íslensk stjórnvöld átti sig á þessu voðaverki og leiðrétti þessa mannvonskuákvörðun, sem hlýtur að vera vanhugsuð frá upphafi.

Ég skal einnig bjóðast til að fara í fangabúðirnar á Ítalíu í stað Pauls, og ekki væri verra ef þú, kæri vinur, kæmir með mér í útlagastjórnina - því ég held að bæði Flokkurinn og Skuggi Skuggason yrðu sáttir við að losna við okkur báða í fangaskiptum fyrir Paul ,,frænda´´og vin vors og blóma.

Þakka þér aftur vinur fyrir þína mannúðlegu baráttu og tæru réttlætiskennd,

Hans Kristján Árnason

PS. Mikið liði mér betur í mínu blessaða föðurhlandi ef þú yrðir skipaður dómsmálaráðherra - og það sem fyrst! kv, sami.

Þráinn sagði...

Þakka hlý orð og góðar undirtektir - og jafnvel hið kunnuglega hnegg Flokkshestanna.
Þetta er síðasta bloggið mitt hérna á Eyjunni að sinni.
Lifið heil.

Nafnlaus sagði...
Þessi athugasemd hefur verið fjarlægð af stjórnanda bloggs.
Nafnlaus sagði...

Þar sem þessi blogg - teppa þín kom á mjög svo vondu tímabili íínu lífi,----- Var að sýsla með allskonarplöntur,Rósir, Morgunfræur, birki (af þremur ,,kvæmum") Verðandi Reynitrjám. og hvað þetta alltsaman heitir í morgunbirtu Guðs. Þarna í svo furuðulegu svæði, sem sveiflast milli þess, að vera sveitó og algerlega nútímavætt landbúnaðar-Útves,. svæði.

Líklega mun svo, að þú hafir ekki ferðast frá þjóðveginum millum, Hellu og Hvolsvallar, uppeftir ,,læk" sem neefnist Hróárslækur, afar lítillátt og gott nafn EN hefði viðeigandi ,,lækur" verið í Þingeyjasýslum,. hefði nafnið verið eitthvað á þá leið ,,AÐAL Hrársfljót.

Hef verið þarna á bökkum þessa furðulega ,,læks" n+u um stundir, burtu frá neti news og öllu.

Sé, að blámaður nokkur hefur hrært nokkuð upp ´i sveitamennskunni, líkt og forðum.

Mjög er ósamsvarandi, hvað fjölskylda hans ,em virðist allir hér búa í góðu yfirlæti, segja um aðstæður hans og hvað han heldur fram um sama.

Mér dettur ekki íhug, Ekki í sekundu, að þeir sem staðið hafa vaktina um ,,réttindi"sonar þessa unga föðurs, hafi verðið hafðið að fíflum en eftir að allir sem þekkja til hans af hanns ætt, segja það sama og allir sem hann fékk higað u0pp tila ð sækja um svipað hæli og hnn sóti um, horfi ég bara á baráttu Spóa, Kjóa, Svartbaks, Hrossagauks og allra hinna fugla hiinsins á bökkum þessa furðulega ,,læks" og þakka Skaparanum aftur og enn fyrir mig og mína.

Þú bjóst til afar marga karaktera, sem ekki gleymast,-- ekki gleyma þeim sjálffur, þau eru þín sköpunarverk,
líkt og upplifun okkar, sem horfðum á ,---með börnum okkar,--- lifa sínu kæifi og spurningarnar um hvernig vinkonan í ,,Sódóma ERvík" og við félagarnir í --love it Fjósalykt--, hefðum brugðist við og hvernig LÍF Nútímamannsins, kemur við börnin OKKAR.

Það mun aðal spurningin sem við verðum spurðir að, þá við verðum gengnir veg allarar veraldar og ekker verður eftir nema samviskan.

Er skynsamlegt, að veita brautargengi, öllum sem ljúga um aðstæður sína,--bar vegna þess, að þaöð er búið að hypa málið.

Ég veit aðuvitað ekkert um það mál né nokkur önnur,--------EN Þarf Ég nokkuð að hafa hana?

Með djúpri virðingu, bæði fyrir þér o g lásnum, sem birtist í kvikmyndinni ,,Með allt á hreinu", Ekki hafa skilaboð að handan verið skýrair íannann tíam og einnig er klárt, að leitun er að manni, sem hefur veriðokkur körlunum til meiri og betri fyrirmyndar en pilturinn, sem kom og kannaðiat við króga sinn, Edrú alla daga, borgað meðlagið. " þettta eru styttur nútíma fólks.

Svo hef ég líka sagt, að maður á aldrey að gera neitt fyri neinn................


Miðbæjaríhaldið,

Nafnalausi Bjarni

á sér trailer frá bretatíð ´i Ketilhúshaga við Hróárslæk.

Gersamlgea git á öllu sem er á baugi og Baugi

Nafnlaus sagði...

Nú rétt í þessu voru að berast ábendingar frá OECD að ef að Ríkisstjórnin víkji ekki frá nú þegar sé staða okkar sú skelfilegasta sem menn hafa séð gerast í vestrænu ríki síðan í seinni heimstyrjöldinni!

Núna sem aldrei fyrr verðum við að standa saman og láta allan heiminn vita af því að við íslendingar látum ekki bjóða okkur meir en komið er af skelfilegum atburðum sem einkennast af spillingu, valdagræðgi
og hroka yfirvalda sem hafa sett okkur út á kaldan klaka og er nú mest umhugað að bjarga eigin skinni en ekki hagsmunum hins almenna íslendings. Viljum við leyfa þeim að halda þessu ÁFRAM? Er ekki komið nóg? Erlend stjórnvöld og stofnanir vilja ekki lána okkur peninga þar sem þeir treysta ekki núverandi Ríkisstjórn. Þetta kostar okkur gífurlegar fjárhæðir með hverri mínútu sem líður og menn vilja ekki víkja vegna ótta við að upp komist um spillinguna sem þeir halda utan um. Hverju höfum við að tapa? Erum ekki nú þegar rúin trausti og orðin gjaldþrota, er það ekki nóg? Eftir hverju erum við að bíða?

Hvetjið alla - alla til að mæta, taka sér hádegishlé og sýna samstöðu.

Friðsamleg Mótmæli við Alþingishúsið klukkan á morgun, miðvikudag, klukkan 12:00!

Tökum höndum saman og myndum SKJALDBORG utan um Alþingishús okkar íslendinga!

Ríkisstjórnin víki Nú Þegar!