Danskar krónur ókeypis á næstunni

Í Viðskiptablaðinu stendur að meirihluti Dana sé tilbúinn að fórna dönsku krónunni og taka upp evru "samkvæmt nýrri viðhorfskönnun sem Greens Analyseinstiut vann fyrir danska viðskiptablaðið Børsen."

Ef þetta gengur eftir er ástæða fyrir Seðlabanka Íslands að vera velvakandi, því að um leið og Danir taka upp evru má fá dönsku krónuna fyrir lítið. Með þessu móti væri hægt að skipta hér snögglega um gjaldmiðil og klekkja um leið á hinum "óprúttnu" aðilum sem eru að fíflast í gengi íslensku krónunnar til að skaprauna Seðlabankastjóranum íslenska.

Framfarir í ferðamálum stjórnmálamanna

Um "reffilega" einkaþotu (af visir.is)

"Reffileg einkaþota lenti á Reykjavíkurflugvelli um sexleytið í dag með þau Geir H. Haarde og Ingibjörgu Sólrúnu Gísladóttur og föruneyti þeirra um borð. Leiðtogafundi NATO lauk í dag og að honum loknum hélt hópurinn fríði beint heim til Íslands, með stuttri viðkomu í Noregi...

Hefð er fyrir því að viðskiptajöfrar á borð við Jón Ásgeir Jóhannesson, Björgólfsfeðga og Hannes Smárason ferðist með einkaþotum, en það þykir víst nýmæli að ráðherrar ferðist með þessum hætti á kostnað skattgreiðenda."

Þessi frétt birtist á visir.is. Bæði fyrir blaðamenn og skattgreiðendur er full ástæða til að lesa síðustu setninguna tvisvar: "...en það þykir víst nýmæli að ráðherrar ferðist með þessum hætti á kostnað skattgreiðenda."

Sacha Cohen í stað John Cleese?

Það er hlegið að okkur úti um allan heim fyrir óstjórn í efnahagsmálum og vanhæfa stjórn Seðlabankans. Erlendir blaðamenn hafa líkt Íslandi við Kasakstan með tilvísun í vinsæla kvikmynd um skoppersónuna Borat. Sagt er að efnahagslíf okkar sé verra heldur en í Kasakstan," segir Guðmundur Ólafsson í helgarblaði DV sem kom út í dag.

 

Hin nýja ímyndarnefnd forsætisráðherra sem á að hanna verulega fína ímynd fyrir Ísland hlýtur því að íhuga að ráða Sacha Baron Cohen, öðru nafni Borat, í stað John Cleese.

 

 

 

Göng til Vestmannaeyja?

Dularfullur þjófnaður á steypurörum - lögregla gáttuð

Fréttablaðið segir í dag frá dularfullum þjófnaði á steypumótum frá Grandagarði, en
verktakinn, Hannes Þór Baldursson, sem ætlaði að nota rörin segir þjófana þurft að fara tvær ferðir á vörubíl með þýfið.

Helst dettur manni í að einkaaðilar hafi í huga að nota rörin til að gera tveggja akreina "skriðgöng" til Vestmannaeyja.

Skipulag Reykjavíkur - til allra er málið varðar

Opið bréf til borgarstjórnar Reykjavíkur

og allra sem í borginni búa

og hafa áhuga á umhverfi sínu.

Ég er búinn að búa í miðborg Reykjavíkur frá því ég kom heim frá námi árið 1977.

Á þeim tíma höfum við Sólveig eiginkona mín sýnt í verki áhuga á að viðhalda gömlum byggingum og breyta niðurníddum hjöllum í fallega mannabústaði.

Þrjú hús höfum við endurnýjað:

1, Klapparstíg 42, sem aðrir aðilar keyptu svo af okkur og héldu áfram að endurbæta.

2. Bergstaðastræti 61 sem sama gildir um,

3. og loks Norska bakaríið, Fischerssund 3, sem var byggt árið 1874 og á sér skrautlega sögu sem mannabústaður og geymsluhjallur.

Síðasttalda húsið sem er núna heimili okkar keyptum við af borginni með því fororði að Grjótaþorpið fengi að vera í friði fyrir öðru en eðlilegu og nauðsynlegu viðhaldi á þeim húsum sem þar eru.

Byggingarmanía

Þetta var árið 1992. Síðan eru íbúar í Grjótaþorpi búnir að standa í samfelldri varnarbaráttu fyrir stórslegnum byggingarplönum og byggingarframkvæmdum.

Á horni Aðalstrætis og Túngötu stendur núna glæsihótel - sem er fallega byggt og af smekkvísi, en vegna stærðar sinnar þrengir þó óneitanlega að byggð við Grjótagötu og syðri hluta Grjótaþorps.

Við í norðurhluta þorpsins höfum heldur ekki farið varhluta af byggingaframkvæmdum. Verst var eyðilegging á Hlaðvarpanum og húsum Tryggva Ófeigssonar við Aðalstræti og Fischerssund.

Þar voru lagðar samþykktar teikningar fyrir íbúa. Ýmsu var mótmælt og fátt eitt (ef eitthvað?) tekið til greina. Fagurfræði kom lítið við sögu, eins og sjá má þegar hótelið er skoðað frá Aðalstræti og líka þegar hugað er að "nútímalegum" og "stöðluðum aðferðum" við byggingu þess.

Verst var að hótelbyggingendur notuðu samþykktar teikingar sínar meira til gamans en sem löglega byggingaruppdrætti. Til að mynda var hótelið sem kom í stað hlaðvarpans hækkað um rúman metra frá samþykkri byggingu.

Hinn ósýnilegi byggingarfulltrúi

Þetta kærðum við íbúar til byggingafulltrúans í Reykjavík með mörgum bréfum og tölvupóstum sem hann hefur ekki látið svo lítið að svara enn þann dag í dag. Einhverjir yfirmenn hans hjá borginni ráku hann þó á staðinn með tommustokk og hvernig sem hann mældi gat hann ekki sett í skýrslu sína annað en byggingin væri um hálfum metra hærri en lög mæltu fyrir um. (Hin raunverulega tala er 130 sentimetrar, en það geri ég ekki að hitamáli).

Þessa staðreynd kærðum við íbúar til "úrskurðarnefndar byggingar- og skipulagsmála" sem tók rúmt ár í að íhuga úrskurð sinn - sem við fengum í hendur í vor.

Hin gagnslausa en tímafreka úrskurðarnefnd

Þar segir nefndin að hún geti ekki kveðið upp úrskurð í málinu um staðfesta og mælanlega hækkun hússins umfram teikningar og leyfi. Ástæðan fyrir úrræða- og úrskurðarleysinu sé sú að "málinu sé ekki lokið" og úrskurðarnefndin sé aðeins úrskurðaraðili í málum sem sé lokið.

Skálkaskjólið sem úrskurðarnefndin fann til að skjóta sér undan að kveða upp augljósan úrskurð um að bygging hefði verið hækkuð um hálfan metra og þar með ansi marga rúmmetra var sú að borgarráð hefði á fundi þar sem byggingafulltrúi viðurkenndi vanrækslu sína og þá staðreynd að húsið væri of hátt falið byggingafulltrúa að skila inn skýrslu um málið, og væntanlega útskýra glöp sín og leggja til úrræði.

Þessari skýrslu hefur byggingafulltrúi vitanlega ekki skilað enn þann dag í dag, og þarf því ekki að óttast þann úrskurð frá "úrskurðarnefnd byggingar- og skipulagsmála" að hann sé ekki starfi sínu vaxinn.

Sífellt þref við yfirvöld

Fyrir utan þessa endaleysu höfum við í Grjótaþorpinu orðið að standa í þrefi við borgaryfirvöld vegna þess að hagsmunir húsbyggjenda hérna í grenndinni voru að rífa gamalt hús sem Benedikt Gröndal átti.

Minjavernd eða Gamlhús eða hvað það fyrirtæki nú heitir vildi óð og uppvæg heiðra skáldið með því að byggja eftirlíkingu af húsi þess í Grjótaþorpinu (þar sem hús þess aldrei stóð). Fjárhagslegir hagsmunir við að endurbyggja eftirlíkingar af gömlum húsum eru miklir, því að þetta er nákvæmnisverk sem þarf að nostra við.

Búið er að stinga upp á þremur stöðum í Grjótaþorpi sem lóð undir eftirlíkingu af Gröndalshúsi sem gæti þá verið ókeypis gististaður fyrir erlenda rithöfunda sem kæmu til Reykjavíkur á vegum Rithöfundasambandsins.

Fyrsta hugmyndin var að setja húsið niður á lítinn grasbala á horni Mjóstrætis og Fischerssund í innan við 10 metra fjarlægð frá húsinu okkar Sólveigar, þannig að hinir erlendu kollegar hefðu þá gott útsýni inn um glugga okkar og gætu séð lifandi rithöfund að störfum. Það er í sjálfu sér falleg hugmynd að flæma burt úr Grjótaþorpinu lifandi rithöfund til að heiðra Benedikt Gröndal dauðan. En fleira kom til greina. Ónotuð lóð við Mjóstræti við hliðina á Vinaminni. Einnig kom til tals að nýta smáleiksvæði sem börn hafa við Bröttugötu. Öllum þessum hugmyndum var harðlega mótmælt með tilheyrandi bréfaskrifum og fyrirhöfn. Mínum athugasemdum er yfirleitt hafnað af sérstakri fyrirlitningu af fólki sem virðist vera búið að bíta það í sig "að ég haldi að ég sé eitthvað" og þess vegna sé það forgangsmál að sýna mér í tvo heimana.

Eini staðurinn fyrir Gröndalseftirlíkinguna

Eini staðurinn sem raunverulega kemur til greina ef þröngva á Gröndalseftirlíkingunni í Grjótaþorpið er á horni Túngötu og Garðastrætis.

Á þeirri lóð liggja nú tveir steinhnullungar sem okkur voru sendir frá einhverju Eystrasaltslandi í þakkarskyni fyrir stuðning í sjálfstæðisbaráttu.

Þessir steinar myndu sóma sér betur einhvers staðar í hinum fallega grjótgarði sem hlaðinn hefur verið sjávarsíðuna í Reykjavík og er skreyttur með grjóti sem Sig. Guðmundsson myndlistarmaður í Kína hefur látið slípa fyrir sig.

Einnig væri auðvitað hægt að flytja Gröndalshús í húsakirkjugarðinn í Árbæ.

Hálfgeðveikir kverúlantar

Nema hvað, reynsla og niðurstaða af því að búa í kvosinni og reyna þar að flikka upp á umhverfi sem var orðið borginni til vansa þegar við komum þangað er í stuttu máli sá: Að hjá borgaryfirvöldum er litið á mann sem hálfgeðveikan kverúlant.

Að úr því að manni hefur tekist að bjarga þremur fallegum húsum frá eyðileggingu segir hvaða flón sem er hjá Reykjavíkurborg: Þetta get ég líka og hef meira að segja meira vit á þessu.

Borgarskipulaginu er ekki hægt að treysta. Tillögur um breytingar á skipulagi eru illa kynntar - og athugasemdir íbúa eru vægast sagt illa séðar.

Engum að treysta

Þegar kemur að byggingaframkvæmdum er ekkert eftirlit af hálfu byggingafulltrúa að farið sé eftir teikningum. Allar reglur um vinnutíma, ónæði, umferð og hávaða eru þverbrotnar.

Að fenginni reynslu myndi ég því ráðleggja öllum nema harðsnúnum þverhausum að búa sem lengst frá miðborginni.

Það sem verst er að þola af hálfu borgaryfirvalda eru hið fullkomna skipulagsleysi. Engin framtíðarsýn. Engin skylda til að varðveita og láta í friði. Aðeins hrokafullar ákvarðanir um að eitthvað geti verið "fjandi" sniðugt, svo sem að fara á rand með eftirlíkingu af húsi Benedikts Gröndals sem "nauðsynlegt" var að rífa svo að háhýsa- og hágróðamenn fengju svigrúm til að reisa risaskrímsli í hjarta borgarinnar.

Óbreytt ástand

Allir vita hvernig borgarstjórnarmálum í Reykjavík er nú komið - en í raun og veru hefur ástandið ekkert breyst. Það er eitt ákveðið í dag og annað á morgun. Allt eftir því hvernig vindurinn blæs. Þannig var það hjá R-listanum, sællar minningar og þannig hefur það verið síðan. Sem betur far man ég ekki eftir Stalínísku einræði Sjálfstæðisflokksins í Reykjavík áratugum saman.

Nú á að fara að byggja flugstöð við flugvöll sem samþykkt var að fjarlægja innan tíðar í lýðræðislegri kosningu allra borgara í Reykjavík.

Að fá einhvern fullorðinn til að stjórna

Það er kominn tími til þess fyrir þá sem "stjórna" borginni að draga djúpt andann, og fara að vanda sig.

Annars neyðist ég eða einhver venjulegur maður en ekki framagosi til að bjóða fram gegn þessu liði sem kemur úr biluðum útungunarvélum stjórnmálaflokkanna og taka við stjórn á stassjóninni - án valdhroka, án vanrækslu, án ábyrgðarleysis og í þágu þeirra sem búa í borginni okkar - og með framtíðarhagsmuni að leiðarljósi, ekki pólitíska hvirfilbylji dagsins.

Samskiptaþreyta

Að lokum þetta. Ástæðan fyrir þessum skrifum er almenn þreyta á samskiptum við Reykjavíkurborg um áratugaskeið. Varðandi Gröndalshús þá bauð ég borginni að leysa til sín húsið mitt og byggja Gröndalshús þar á lóðinni eða í næsta nágrenni og ég skyldi láta mig hverfa orðalaust - ef það væri einlægur vilji í borgarstjórn að heiðra dáið skáld sem bjó við Vesturgötu með því að hrekja í burt lifandi skáld sem býr í Grjótaþorpi.

Eitt í dag - annað á morgun

Að lokum þetta: Það er mikil vinna og fjárútlát, skuldbinding, sem fylgir því fyrir venjulegt fólk að koma sér upp húsi.

Slíkt fólk á að lifa í samvinnu við borgaryfirvöld verndað af ákveðnu og traustu skipulagi en ekki í stöðugum ótta við að borgarfulltrúum detti einhver vitleysa hug, ein í dag, önnur á morgun.

Úrskurðar- og skipulagsnefnd fái mál til úrskurðar

Svo mætti borgarstjórinn í Reykjavík gjarna sparka í rassinn á sínum ónýta byggingarfulltrúa og reka á eftir honum að skila mælingaskýrslunni um Hlaðvarpahúsið - svo að úrskurðarnefnd skipulags- og byggingarmála getið fengið skýrslu um að málinu sé lokið og úrskurðað að húsið er ekki byggt samkvæmt teikningu og byggingarfulltrúinn í Reykjavík er ekki starfi sínu vaxinn frekar en svo margir aðrir sem eru að "stjórna" borginni okkar og ráðskast með okkur.

Reykjavík er annað og meira en stjórnmálaflokkar

Mér er nákvæmlega sama hvaða stjórnmálaflokkar stýra borginni, en mér er fyrirmunað að skilja af hverju þarf að láta eins og höfuðborg landsins sé sérstakt borgríki sem stjórna þarf með stjórn og stjórnarandstöðu - í stað þess að stjórna með tilliti til einstakra mála, þannig að borgarfulltrúar séu fulltrúar borgarbúa en ekki þrælar stjórnmálaflokka.

Skrifað 4. apríl, 2008

Þráinn Bertelsson

Fischerssundi 3

101 Reykjavík

Að klóra Albaníu á bakinu

Framboð til Öryggisráðs SÞ: Albanía heitir Íslandi atkvæði

Lulzim Basha

"Þið eigið okkar stuðning vísan," svaraði Lulzim Basha, utanríkisráðherra Albaníu, spurningu Fréttablaðsins um afstöðu albanskra stjórnvalda til framboðs Íslands til Öryggisráðs Sameinuðu þjóðanna."

Ef maður klórar Albaníu á bakinu kýs Albanía mann í öryggisráðið.

Ólympíuleikarnir eru fyrir íþróttamenn - ekki pólitíska fanga

Geir H. Haarde um ÓL í Kína: Leikarnir snúast ekki um pólitík

Íslensk stjórnvöld hafa ekki ákveðið hvort þau sniðgangi Ólympíuleikana í Kína. Angela Merkel Þýskalandskanslari og fleiri þjóðarleiðtogar ætla ekki að sækja leikana í mótmælaskyni við ástand mannréttindamála í Kína.

„Mér finnst ekki tímabært að kveða upp úr um það," svaraði Geir Fréttablaðinu í gær. „Ólympíu­leikarnir snúast ekki um pólitík."

Þetta er þörf ábending frá forsætisráðherra okkar, því að á Ólympíuleikum er keppt í fjölmörgum íþróttagreinum og allir kínverskir íþróttamenn sem ekki sitja í fangelsum af pólitískum ástæðum fá að taka þátt, hafi þeir náð tilskyldu lágmarki í sinni keppnisgrein.

 

Drap hann mann eða rithöfund?

Frægur útgefandi viðurkennir í viðtali að hafa drepið mann

Furðulegt mál er komið upp í bresku pressunni.

Felix Dennis, milljarðamæringur og útgefandi hins vinsæla karlatímarits Maxim og fleiri tímarita, viðurkenndi í viðtali sem birtist í miðvikudagsútgáfu The Times að hafa eitt sinn drepið mann.

 

Hér mun hafa verið um rithöfund að ræða og er talið ólíklegt að mikið veður verði gert út af þessu leiðindaatviki.

Spilling í erlendum háskóla

Prófessor dæmdur fyrir mútur og spillingu

Hanover

Dómstóll í Þýskalandi dæmdi í dag lagaprófessor í þriggja ára fangelsi fyrir að hafa gefið nemendum sínum betri einkunnir í skiptum fyrir peninga og kynlíf.

Prófessorinn, sem er 53 ára og býr í Hanover, viðurkenndi að hafa þegið alls um 156 þúsund evrur fyrir að hleypa nemendum sem fallið höfðu á prófum í gegn um kúrsinn sinn.

Áður en dómurinn var kveðinn upp sagði prófesorinn að hann hefði ekki átt fyrir skuldum og því hefði hann leiðst út þessa iðju.

Mikið er gott að svona lagað skuli ekki geta komið fyrir á Íslandi.

Núna vill Bíbí lög til að refsa fyrir hluti sem ekki hafa gerst...

Yndið mitt, hann Bíbí, fer á kostum í dag og minnist hvorki á blóð í sokkum eða vettlingum O.J. Simpsons, heldur lýsir með grúpíustjörnur í augunum fyrirlestri lögfræðings sem átti þátt í að þessi ófreskja var sýknuð af að hafa drepið tvær manneskjur.

Bíbí segir sjálfur frá :

"Fimmtudagur, 03. 04. 08.

Fór síðdegis á fund lögfræðinga með Alan M. Dershowitz, prófessor frá Harvard. Fyrirlesturinn snerist um það, sem hann kallaði ný lögfræðileg viðmið. Hvernig skal haga löggjöf til að unnt sé að takast á við eitthvað, sem ekki hefur gerst en er talið yfirvofandi? Hættan af hryðjuverkum kallar á slíka löggjöf að mati Dershowitz. Hann er öflugur málflytjandi og styður málstað sinn skýrum rökum."

Það er skemmtilegt viðfangsefni að setja lög um hluti sem aldrei hafa gerst, en sumum finnst þó meira aðkallandi að dæmt sé eftir þeim lögum sem þegar eru í gildi af dómurum sem eru hæfir til að skipa dómarasæti.

Nei, Hannes, við þurfum ekki "smá málfrelsi"

Hannes Hólmsteinn spyr:

"Hvernig er það, eigum við ekki að leyfa smá málfrelsi að blakta eins og kerti?"

Nei, aldeilis ekki.

Við skulum varðveita málfrelsið eins og kyndil sem kveikir þann varðeld sem ornar þjóðinni og heldur draugum og ófreskjum næturinnar í hæfilegri fjarlægð. Við skulum kenna dómstólum þjóðarinnar að málfrelsi er bjartur, logandi og eilífur eldur - ekki skíma frá vasalugt eða kertisstubbi.

Við skulum virða skoðanir hvers annars, hafa vísindaleg vinnubrögð í heiðri ef við viljum vera vísindamenn og forðast sérgæsku og ófyrirleitni. Og umfram allt hroka, valdagræðgi, nepotisma, sleggjudóma, mont og oflæti.

Fyrir rithöfunda, blaðamenn og þjóðina er ekki nóg að smá málfrelsi blakti eins og á skari.

Við vinnum verk okkar með þjóðarhag að leiðarljósi og erum laus við þá freistingu sem launakerfispunktar háskólans reynast þeim sem eiga erfitt með að standast freistingar.

Stöndum vörð um málfrelsi. Leyfum skímunni á kertisstubbum ritþjófanna að brenna út, sú skíma er villuljós, þeirra sem kjósa að starfa þar sem dimman ríkir.

Rúmenar opna nýja vídd í samskiptum þjóða - stinga upp á að þjóðir hafi landaskipti

Landaskipti við Rúmena?

 

Óvænt atvik á NATO-fundi

Búist er við að einhver röskun verði á ferðaáætlun forsætis- og utanríkisráðherra á NATO-fundinn í Búkarest.

 

Óstaðfréttar fréttir herma að forseti Rúmeníu hafi á einkafundi með íslensku fulltrúum boðið Íslendingunum að hafa slétt skipti á löndunum. Rúmenar eiga erfiða fortíð sem umhverfi þeirra minnir þá stöðugt á. Sama má segja um Íslendinga sé gengið um Laugaveginn.

 

Tilboðið var sett fram í trúnaði og ef það verður samþykkt munu þjóðirnar hafa landaskipti upp úr miðjum júní nk. enda ekki eftir neinu að bíða.

Ætlaði að ræna Íslendinga heiðrinum

Erlendur svikahrappur

Hugh Hendry, yfirmaður fjárfestingasviðs hjá breska vogunarsjóðsfyrirtækinu Eclectica Asset Management, einn fjárfestanna sem hagnast hafa á veikingu íslensku krónunnar, stærði sig af því árið 2006 að hann vildi láta minnast sín sem mannsins sem gerði Ísland gjaldþrota, segir í forsíðufrétt Morgunblaðsins í dag. Hendry sagði þetta m.a. í viðtali við breska blaðið Times 8. júlí 2006: "I want to be known as the man who bankrupted Iceland."

Nú er komið í ljós að Hendry þessi á við athyglisfíkn að stríða og allt tal hans um að gera Ísland gjaldþrota eru órar taugabilaðs manns. Hann segist líka hafa skrifað bækur Laxness, málað myndir Kjarvals og hafa stofnað Kolkrabbann.

Enginn einn maður getur eignað sér heiðurinn af því að setja landið á hausinn, en þó er gott til þess að vita að afrekið var unnið af íslenskum afreksmönnum en ekki útlendingum.

Háskóli Íslands endurskilgreinir vísindi - vekur alheims athygli

Rektor áminnir ekki Hannes

Rektor Háskóla Íslands átelur vinnubrögð Hannesar Hólmsteins Gissurarsonar, prófessors í stjórnmálafræði og gerir þá kröfu að þau verði ekki endurtekin.

Í tilkynningu frá háskólanum segir að nýfallinn dómur í Hæstarétti sé staðfesting þess að Hannes Hólmsteinn hafi sýnt af sér óvandvirkni í starfi sem teljist ósæmileg og samrýmist ekki kröfum Háskóla Íslands.

Þessi málalok eru óneitanlega framúrstefnuleg og þurrka í rauninni út allar takmarkanir fyrir því hvað geti talist vísindi.

Auðvitað eru vísindi og vísindaleg vinnubrögð stöðugt skilgreind upp á nýtt, þótt skilgreining á heiðarleika hafi staðið óbreytt nokkuð lengi.

Þessi djarflega ákvörðun bendir til þess að Háskóli Íslands ætli sér að ná því takmarki að verða einn af hundrað bestu háskólum heims með öllum tiltækum ráðum. Alla vega einn af þeim sem mest verður hlegið að.

Til tals hefur komið að færa Hannes milli háskóladeilda og láta hann kenna nýnemum "How to survive in a corrupt world" í félagsfræðideild í staðinn fyrir "I and the people I know" í stjórnmálafræði.

Gangandi Makedónar spara þotuleigu

Makedónar gengu af NATO-fundi

Sendinefnd Makedóníu gekk af leiðtogafundi Atlantshafsbandalagsins í dag eftir að aðildarríki neituðu að bjóða Makedóníumönnum aðild að bandalaginu vegna óútkljáðrar nafnadeilu þeirra og Grikkja.

Svo heppilega vildi þó til að ekki þurfti að kaupa einkaþotu undir Makedónana. Það var stutt fyrir þá að fara svo að þeir gátu gengið heim af fundinum.

Háskóli með svartan blett á tungunni

Segir Hannes hafa logið að þjóðinni

MYND/GVA

    „Ef nemendur eru reknir fyrir að stela úr verkum annarra og gera þau að sínum þá hlýtur það sama að ganga yfir kennara..."

    Að þessu spyr Guðný Halldórsdóttir sem ásamt fleirum undrast aðgerðaleysi Háskóla Íslands í máli hins nýdæmda prófessors Hannesar Hólmsteins.

    Þetta er flókin spurning sem Háskóli Íslands mun eiga í erfiðleikum með að svara, því að þótt allir séu jafnir eru sumir jafnari en aðrir.

   

 

Alvöruháskóli

Deildarforseti háskóla í Durham rekinn fyrir ritstuld

Viðskiptaháskólinn í Durham.

Tony Antoniou deildarforseti við Viðskiptaháskólann í Durham á Bretlandi hefur verið rekinn fyrir ritstuld. Tony tók veigarmikla kafla sem hann notaði orðrétt í blaðagrein og doktorsritgerð sína.

Antoniou vék fyrst sem deildarforseti í september þegar ásakanirnar komu fram. Hann var síðan rekinn frá háskólanum á meðan rannsókn fór fram á ritstuldinum og var síðan sviptur doktorsgráðunni frá York háskólanum sem hafði veitt honum verðlaun fyrir ritgerðina árið 1986.

Það vekur athygli að þrátt fyrir þessar harkalegu aðgerðir hefur ekki verið gripið til fjársöfnunar til að styrkja prófessorinn með verðlaunafé - enda hefur hann ekki hlotið dóm í hæstarétti.

Að hjálpa ógæfumönnum að bandarískri fyrirmynd

Að hjálpa ógæfumönnum


O.J. Simpson morðinginn sem kunningi dómsmálaráðherrans okkar fékk sýknaðan af ákærum af að hafa drepið eiginkonu sína og mann sem var staddur í húsi hennar.

Litlu síðar, 5. feb. 1997, var svo Simpson sakfelldur í einkamáli fyrir að hafa valdið dauða Nicole Brown og Ronald Goldman. Hann var dæmdur til að greiða erfingjum hinna myrtu 33 og hálfa milljón dala í skaðabætur.

Illa hefur gengið að rukka inn skuldina. Simpson skrifaði þó í fjáröflunarskyni bókina: "If I Did It: Confessions of the Killer" í samvinnu við mann sem var skrifandi og kunni á gæsalappir og allt það.

Ónefndur velgjörðamaður greiddi lögfræðikostnað Simpsons. Þeir bandaríkjamenn sem hafa samúð með O.J. Simpson og vorkenna honum að þurfa að borga skuldir sínar hafa stofnað styrktarsjóð honum til stuðnings.

Svona styrktarsjóðir eru ekki einsdæmi eins og sjá má af því að nú hefur verið stofnaður sjóður á Íslandi til að hjálpa prófessor Hannesi Hólmsteini til að gera upp sektir sem á hann hafa verið dæmdar.

Seðlabankinn: "The More, The Merrier"

Næsti aðstoðarmaður Davíðs


Örn Úlfar Sævarsson hefur sett fram athyglisverða hugmynd:

"Mugabe í Svörtuloft?

Mugabe hefur í fyrsta skipti viðurkennt ósigur í forsetakosningum í Simbabve. Heyrst hefur að sinniskiptin séu vegna þess að hann hafi fengið atvinnutilboð frá ónefndum Seðlabanka."

Þetta hefur ekki fengist staðfest en mannauðsstjóri ríkisstjórnarinnar hafði þetta um málið að segja:

"The more, the merrier"

Síðasti aðstoðarmaður Davíðs, Illugi Gunnarsson, er nú kominn á þing fyrir Flokkinn.

Geir Haarde: Með nagla í höfðinu?

Naglar valda pirringi og höfuðverk


Einn af okkar bestu blaðamönnum, rithöfundum, sjónvarpsmönnum og ljóðskáldum, Sigmundur Ernir - Súper-Örninn - hittir forsætisráðherranaglann beint á höfuðið í grein sinni á visir.is.

Hann segir: "Ég sé ekkert athugavert við það að ráðpamenn leyti allra leiða til að komast sem ódýrast á milli staða. Og ef það er rétt, sem Geir H. Haarde, heldur fram að kostnaður við einkaþotuna hafi verið svo naumlega umfram aðrar vélar að tímasparnaðurinn vegi það upp, ja ... þá sé ég ekki stóraglæpinn. Munurinn á kostnaði mun vera 100 til 200 þúsund krónur, einkaþotunni í óvil.

Hitt vekur mig til umhugsunar; viðbrögð Geirs H. Haarde við umræðufárinu um þessa blessaða einkaþotu. Hann segir hana "lýsandi fyrir stjórnmálaumræðuna" eins og Moggi hefur eftir honum. Geir er nokkuð pirraður.

Hann á að vera yfir það hafinn.

Það skal alltaf vera hlutverk fjölmiðla að veita ráðamönnum aðhald. Ráðamenn eiga sjálfir að sækjast eftir þessu aðhaldi í upplýstu lýðræðissamfélagi. Fjölmiðlar eiga að leita svara í þessu efni sem öðru þegar ráðamenn eru að eyða peningunum okkar eða semja um okkur lög sem við eigum að gjöra svo vel að fara eftir."

Undir þetta vil ég taka með Sigmundi Erni:

Blaðamenn eiga að spyrja. Blaðamenn eiga að hitta naglana, stóra og litla, beint á höfuðið. Og forsætisráðherrar og aðrir naglar eiga ekki að vera pirraðir þótt þeir fái nagla í höfuðið.

Tvíhliða fundir um tvíhliða mál

Tvíhliða fundir í tísku í utanríkismálum

Á visir.is stendur:

Ingibjörg Sólrún hittir Rice í Washington

Frá blaðamannafundi Geirs Haarde og Ingibjargar Sólrúnar í Búkarest í kvöld sem virðist hafa verið fremur "tvíhliða" en "fjölsóttur".

Guðjón Helgason í Búkarest skrifar:

"Ingibjörg Sólrún Gísladóttir, utanríkisráðherra, mun eiga tvíhliða fund í Washington með Condoleezzu Rice, utanríkisráðherra Bandaríkjanna þann 11. apríl næstkomandi.

Viðræður á grundvelli varnarsamkomulags Íslands og Bandaríkjanna munu fara fram á þeim fundi auk þess sem önnur tvíhliða mál ríkjanna verða rædd.

Einnig munu untanríkisráðherrarnir ræða samstarf kvenna í þeirri stétt. Þær Ingibjörg Sólrún og Rice kynntust einmitt á samstarfsvettvangi kvennutanríkisráðherra."

Væntanlega af öryggisástæðum er ekki nánar útskýrt um hvaða tvíhliða mál verða rætt á fundi Condoleezu og Ingibjargar né heldur hvers vegna ákveðið hefur verið að hafa fundinn tvíhliða að því er virðist nema hvað varðar tvíhliða kynni þeirra á "samstarfsvettvangi kvenutanríkisráðherra.

Því ber að fagna að tvíhliða mál Íslands og Bandaríkjanna skuli aðeins hafa tvær hliðar þannig að hægt skuli að leysa þau með tvíhliða viðræðum á tvíhliða fundi. Leitað er nú að "góðu díl" til að finna ódýra en rúmgóða tvíhliða einkaþotu fyrir Ingibjörgu Sólrúnu.

Tvíhliða þotur, þar með taldar tvíhliða einkaþotur, eru nú á þróunarstigi og er þeim einkum ætlað að rannsaka hvort svonefnd svarthol og svo að sjálfsögðu önnur mál í geimnum eru einhliða, tvíhliða, þríhliða eða marghliða.

Sjá nánar meðfylgjandi mynd af grein úr tvíhliða vísindaritinu ASTRONOMY AND ASTROPHYSICS sem birtist með þessari frétt. Að sjálfsögðu þarf að tvísmella á greinina.

(Washington er spölkorn frá Búkarest svo að þetta er heilmikið ferðalag).

Bling-bling!

Þráinn: Bíbí ruglar saman sýknudómi og sakleysi og sektardómi og réttlæti en þekkir samt sundur sokka og hanska

Dómsmálaráðherrann skrifar á bloggið sitt:

"Glæpasagnahöfundurinn Þráinn Bertelsson ræðir um O. J. Simpson málið í tilefni af dagbókarfærslu minni hér í gær. Þráinn er ekki betur að sér en svo, að hann ruglar saman hanska og sokki, þegar hann ræðir um sönnunargagnið, sem leiddi til sýknu Simpsons. Alan M. Dershowitz, verjanda hans tókst að sýna kviðdóminum, að lögreglan hafði falsað „sönnunargagn“ með því að láta blóð leka í sokk. Á því féll málatilbúnaður ákæruvaldsins."

Ég svara:
Ég kom ekki nærri því að sýkna O. J. Simpson, enda er ég hvorki lögfræðingur né áhugamaður um trix til að fá morðingja sýknaða fyrir dómstólum. Það var kunningi þinn, Alan M. Dershowitz verjandi Simpsons sem tók "sokka og hanskasnúninginn" á dómaranum og vesalingur minn kom þar hvergi nærri.

Að bendla mig við að misskilja þessa lögfræðilegu fínessu sem þér finnst svo athyglisverð er fremur dapurlegur útúrsnúningur af þinni hálfu - samkvæmt þeirri lógík sem er að verða kækur þinn; að gera andstæðingum þínum upp skoðanir og útmála síðan hvað þær séu vitlausar.

Sumum þykja svona vinnubrögð aðdáunarverð. Mér ekki. Samt vil ég frekar sjá sekan mann ganga lausan en saklausan mann dómfelldan.

Hér á Íslandi var framið hryllilegt dómsmorð sem kallað er Geirfinns-málið, eða mál 214 (minnir mig), þar sem sakborningar voru meðhöndlaðir eins og gerðist á tímum Rannsóknarréttarins. Engin lík hafa fundist. Engin morðástæða hefur fundist. Ekkert hefur fundist sem tengir sakborninga í Geirfinnsmálinu við morð - nema játningar sem fengnar voru með einangrun og pyntingum og voru að sjálfsögðu dregnar til baka. Samt var þetta fólk dæmt.

Ágæti dómsmálaráðherra, vera kann að við séum ósammála um marga hluti, en ég vona að þú sért mér sammála um að Geirfinnsmálið sé ljótur blettur á íslenska dómskerfinu, og það þurfi að taka upp málið aftur og komast að nútímalegri niðurstöðu.

Þetta verður örugglega einhvern tímann gert, og ég vona og trúi reyndar að þú búir yfir réttlætiskennd og mannúð sem nægir til að sjá til þess að þetta verði gert meðan ennþá þetta forsmáða og ærulausa fólk er enn ofar moldu. Breiðavíkurmálið er ljótt mál og nokkur hugsvölun að yfirvöld virðast vilja viðurkenna mistök og bæta fyrir þau. Geirfinns-málið er hræðilega ljótt.

Það skiptir meira máli en einhverjar lögfræðilegar hártoganir og Heimdallarútúrsnúningar um sokkaplögg og hanska ógæfumannsins O. J. Simpson. Ég trúi að þú sért - þrátt fyrir margvíslegan skoðanaágreining - innst inni drengur góður. Og tími til kominn að leyfa þeim fallegu eiginleikum þínum að njóta sín líka meðan þú gegnir þessu embætti.

Ferðin gengur vel: Geir og Sóla fengu kjúkling

Á fréttavef Vísir.is kemur fram að ferðalag forsætisráðherra, utanríkisráðherra og kó til Búkarest með ódýrri einkaþotu gengur mjög vel.

Þar segir:

"Þess má geta að flugferðin með einkaþotunni gekk vel í dag. Lagt var af stað snemma í morgun og flogið áleiðis til Stavanger í Noregi. Á leiðinni þangað var flugfarþegum boðið upp á ommelettu í morgunmat. Í Stavanger var stoppað í hálftíma á meðan vélin var fyllt af eldsneyti. Svo var haldið til Búkarest en á leiðinni þangað var Geir, Ingibjörgu og föruneyti þeirra boðið upp á kjúkling."

Þessi fábrotnu en hollu matvæli sýna að ríkisstjórnin vill ganga á undan í sparnaði á þessum síðustu og verstu tímum, því að Beluga-kavíar, Moet & Chandon-kampavín og Kobe-nautasteik hefur ekki verið innifalin í hinu lága verði.

Visir.is segir ennfremur: "Forsætisráðuneytið var búið að bóka áætlunarflug til Búkarest með viðkomu í London í eina nótt áður en ákvörðun var tekin um að fljúga frekar á Nato fundinn með einkaþotu.

Að sögn Grétu Ingþórsdóttur, aðstoðarkonu Geirs Haarde, var ákveðið að taka síðari kostinn þegar í ljós kom að kostnaðurinn væri aðeins 100 til 300 þúsund krónum meiri.

Að sögn Grétu fékk forsætisráðuneytið "mjög góðan díl" hjá fyrirtækinu sem leigði út einkaþotuna. Hún vill þó ekki gefa upp nákvæman kostnað."

Bíbí í toppfélagsskap

Það er yndislegt að fylgjast með því sem dómsmálaráðherra bloggar og deilir með okkur af lífi sínu og störfum.

Í bloggi sínu dagsett 1. apríl segir dómsmálaráðherra m.a.:

"Hitti Alan M. Dershowitz, lagarprófessor við Harvard, sem hér er á fyrirlestraferð. Hann er ekki aðeins þekktur sem prófessor og höfundur margra bóka, heldur einnig sem verjandi, t.d. O. J. Simpsons."

Hvernig var það nú aftur? Þessi Simpson var sýknaður með miklum lagakrókum af því að hafa drepið fjölskyldu sína eða alla vega konuna sína. Aðalsönnunargagnið í málinu var blóðugur hanski sem verjendur Simpsons fengu dómarann til að úrskurða að kæmi ekki málinu við.

Nema hvað, þess vegna segja grínarar að O.J. Simpson hafi spurt verjanda sinn, Alan M. Dershowitz:

"Not guilty? Þýðir það að ég geti geti fengið hanskana mína aftur?"

Svarið var: "Nei, það þýðir að þú hefur verið heppinn með verjendur."

Gæðingurinn vakri Jónas!

Reynir Traustason segir að Jónas Kristjánsson sé brokkgengur gæðingur.
Allavega tekur Jónas snarpan skeiðsprett á bloggi sínu í dag:

2008-04-02 Punktar
Ranglátu stimpilgjöldin Dæmalaust vitlaus er aðferð Björgvins G. Sigurðssonar viðskiptaráðherra við afnám stimpilgjalda af fasteignakaupum. Það nær aðeins til kaupa á fyrstu íbúð. Og af hálfri íbúð, ef annað hjóna á íbúð fyrir! Svo sértæk aðgerð kallar á fleiri jaðartilvik en þessa hálfu íbúð. Hagfræðilega er rétt að afnema stimpilgjöld í öllum tilvikum. Það hefur fullt réttlæti í för með sér og útilokar svindl. Stimpilgjöld eiga ekki að mæta kostnaði ríkissjóðs, sem er enginn. Þetta er hreinn skattur, sem dregur úr fasteignakaupum. Nær er að efla slík viðskipti. Húsnæðisþörf fólks breytist eftir æviskeiðum.

Svona texti flokkast ekki undir brokk - heldur er þetta hinn fegursti skeiðsprettur.

Utanríkisráðherra á þreföldum hljóðhraða

Handvömm að ráðherra fundaði ekki með nefnd fyrir Búkarestferð

Handvömm eða óprúttnir aðilar virðast hafa ráðið því að utanríkisráðherra fundaði ekki með utanríkismálanefnd Alþingis áður en hún hélt á leiðtogafund Atlantshafsbandlagsins í Búkarest í dag. Þetta sagði Árni Páll Árnason, varaformaður utanríkismálanefndar á Alþingi.

Steingrímur J. Sigfússon, fulltrúi Vinstri - grænna í nefndinni, kvaddi sér hljóðs á þingfundi og benti á að hann hefði á mánudag óskað eftir fundi í nefndinni með Ingibjörgu Sólrúnu Gísladóttur utanríkisráðherra áður en hún færi til Búkarest.

Nú er verið að prútta við bandarísk yfirvöld um hversu mikið myndi kosta að leigja hraðfleygustu þotu heimsins Lockheed SR-71 Blackbird, þannig að hægt væri að senda tvo til þrjá sérsveitarmenn til Búkarest eftir utanríkisráðherra.

Þannig gæti ráðherrann fundað með utanríkismálanefnd á Loftleiðahótelinu meðan Blackbird-þotan biði fyrir utan - og verið komin aftur til Búkarest í tæka tíð fyrir fundinn.

Farkostur utanríkisráðherra og föruneytis er lítil og ódýr einkaþota af gerðinni Dornier 328 sem nær aðeins um 360 mílna flughraða á klukkustund. Mikill tími og þar af leiðandi peningar myndu sparast ef íslenskir ráðamenn ferðuðust með Blackbird sem nær rúmlega þreföldum hljóðhraða eða MACH 3.2.

Tími til að hugsa?

     Sú saga er sögð um Ernest Rutherford (1871-1937). Hann var frá
Nýjasjálandi og var eðlisfræðingur. Eitt sinn hafði Rutherford nemanda
sem var óvenju vinnusamur. 

    Rutherford veitti þessu athygli og spurði:

    - Vinnurðu fram eftir á kvöldin?

    - Meðan ég get haldið augunum opnum, sagði nemandinn.

    - Og þú ert mættur hér eldsnemma á morgnana?

    - Við fyrsta hanagal, sagði sá námfúsi.

    - En hvenær hefurðu tíma til að hugsa? spurði Rutherford furðu lostinn.

Margrét Frímannsdóttir þekkir taktana

Óttast ekki klíkustríð á Litla-Hrauni

segir Margrét Frímannsdóttir

„Það er auðvitað kunningskapur á milli manna sem kannski koma inn og hafa lengi verið saman í afbrotum. En það er ekki þannig að hér séu einhver gengi," segir Margrét Frímannsdóttir, fyrrum alþingismaður og formaður Samfylkingarinnar.

Margrét lét af þingmennsku fyrir nokkru og mun hér að vera að tjá sig um fangelsið að Litla-Hrauni en ekki sinn fyrri vinnustað.

Góða ferð - og góða heimkomu!

"Það er kannski ekki stæll á því að fara á hausinn
en það er samt hægt að fara á hausinn með stæl." Þ.B.

"Living in the lap of luxury isn't bad, except that you never know when luxury is going to stand up” Orson Welles

“Power does not corrupt. Fear corrupts...
perhaps the fear of a loss of power.” John Steinbeck

“It is said that power corrupts, but actually it's more true
that power attracts the corruptible.
The sane are usually attracted by other things than power.”
David Brin

Össur enn í næturvinnu!

Dr. Össur Skarphéðinsson hefur nú ekki sést á næturbloggi sínu um nokkurt skeið. Óvildarmenn hans töldu að forsætisráðherra hefði svipt ráðherrann tjáningarfrelsi nema milli kl. 9 og 17 á virkum dögum.

Ekkert var þó fjar lagi. Í tómstundum sínum hefur dr. Össur nú hannað einkaþotu sem er hæfilega stór til að bera ríkisstjórnina, aðstoðarmenn hennar sem vinna verkin, og sérvalinn hóp blaðamanna sem misskilur allt og leggur út á versta veg.

Einkaþota íslensku ríkisstjórnarinnar verður smíðuð í Chile þegar búið er að klambra saman varðskipinu handa Bíbí - og hefur hún þann kost með sér að hún er eingöngu knúin jarðhita.

Talið er að markaður sé mikill utan Arabalandanna fyrir farartæki af þessu tagi og útrásarmöguleikar gífurlegir.

Óprúttnir aðilar koma í ljós á skyggnilýsingafundi

Davíð Oddsson seðlabankastjóri hefur mjög trúlega á réttu að standa varðandi samsæri óprúttinna aðila um að rúínera Seðlabankann og kosta Davíð þar með vinnuna.

Á skyggnilýsingafundi sem haldinn var á einkaheimili hérna í borginni í fyrrinótt gáfu þrír sérlega óprúttnir aðilar sig í ljós og hældust um af illverkum sínum. Þá gaf sig í ljós í salnum Séra dr. Griziodeck sem kostaður hafði verið hingað af gjaldeyrisvarasjóði Seðlabankans.

Séra Griziodeck er heimsfrægur draugabani eða exorsisti. Slumaði þá í hinum óprúttnu aðilum og þeir hurfu í reykjarskýi og skildu eftir sig brennisteinfnyk í salnum.

Séra Griziodeck kvaðst hafa borið kennsl á tvo þessara aðila og nefndi Kölska og ömmu hans, en hún var í hjólastól. Þriðja aðilann hafði draugabaninn ekki séð áður en hann var með baug á hverjum fingri.

Ljósmyndurum var mjög brugðið við þessa uppákomnu og náðust engar ljósmyndir fyrr en hinir óprúttnu ærsladraugar voru horfnir. Óprúttna konan, sem séra Griziodeck, telur að sé amma Kölska, skildi þó hljólastól sinn eftir.

Hæstaréttardómara og litlum frænda sem var þarna staddur sýndust þeir sjá þarna persónur sem svipaði til persóna úr hinni mögnuðu kvikmynd "Myrkrahöfðinginn" sem Davíð hefur mikið dálæti á. Draugabaninn hefur horft á valdar senur úr Myrkrahöfðingjanum í dag, og segir "baugamanninn" á skyggnilýsingafundinum líkjast helst biskupnum í myndinni. Þessu tvennu er erfitt að koma heim og saman.

Tæknideild Lögreglunnar og særingadeild Þjóðkirkjunnar hafa rannsakað stólinn í allan dag en hvorki fundið DNA eða fingraför, hvorki á stólnum né á eintaki af Séð og heyrt sem lá eftir í stólnum.

Sparnaðarfarkostur ráðuneytanna

Flugvélin, sem er af gerðinni Dornier 328 er leigð af íslenska fyrirtækinu Icejet í þessa sparnaðarför.

Fyrsta vélin af þessari gerð fór í reynsluflug 6. des. árið 1991; 83 svona vélar voru smíðaðar svo að soldil reynsla er komið á flughæfni vélarinnar.

Gréta vildi ekki gefa upp kostnaðinn við flugið. Og þaðan af síður sparnaðinn við að leigja einkaþotuna, enda gæti það haft þær afleiðingar að allir færu að leigja einkaþotur og hefðbundið áætlunarflug legðist af. Aðeins tvær vélar svipaðri þessari hafa farist á síðustu árum.

Fjórtán manns fara í ferðina, tíu frá ráðuneytunum og fjórir blaðamenn.

Pláss er fyrir fjórtán manns á fyrsta farrými véla af þessari gerð – en þá er yfirleitt ekki gert ráð fyrir blaðamönnum í þeim hópi heldur annars konar farþegum.

Þetta er lýsandi dæmi um að það þarf ekki að kosta mikla peninga að skemmta sér.

Sultarólin hert - flogið með einkaþotu

Geir og Ingibjörg Sólrún með ÓTRÚLEGA ÓDÝRRI einkaþotu á NATO-fund

Íslenska sendinefndin sem fer á leiðtogafund NATO í Búkarest á morgun mun ferðast með einkaþotu til Rúmeníu frá Íslandi. Aðstoðarkona forsætisráðherra segir kostnaðarmuninn á ferðinni miðað við áætlunarflug óverulegan.

Með vélinni fara þau Geir H. Haarde forsætisráðherra og Ingibjörg Sólrún Gísladóttir utanríkisráðherra auk fylgdarliðs og blaðamanna.

Ekki liggja fyrir nákvæmir útreikningar á því hvað Air Rumenskí býður betur en Sterling, Easy Jet og Iceland Express.

En græddur er geymdur eyrir. Og það er ánægjulegt þegar íslenskir stjórnmálamenn hafa komist upp á lag með að ná niður ferðakostnaði sínum með því að leigja einkaþotur.

Þess má geta að þátttakendur í ferðinni taka með sér smurt að heiman.

Eldsneytislækkun fyrir leikfangabíla - um leigubíla gilda önnur lögmál

Bílstjórar mótmæla eldsneytisverði

Leigubílstjórar, ásamt sendibílstjórum og ferðaklúbbnum 4x4, efna til mótmæla í dag, gegn háu eldsneytisverði, þegar þeir aka bílum sínum frá Klettagörðum að Austurvelli.

Meirihluti er fyrir því í ríkisstjórn að þeir sem eiga stóra leikfangabíla sér til skemmtunar fái afslátt á eldsneytisverði svo að þeir geti haldið áfram að njóta lífsins með konum sínum og börnum.

Hinir sem sem hafa valið sér það hlutskipti í lífinu að aka stórum bílum í atvinnuskyni geta hækkað taxtann samkvæmt markaðslögmálum.

Tilkynning frá ríkisstjórn Íslands

Í tilefni af því að okkur hefur loksins tekist að "semja um starfslok" við Davíð Oddsson seðlabankastjóra verða nokkrar bráðabirgðabreytingar á verslunarháttum þjóðarinnar næstu daga.

1. Íslenska krónan er ekki lengur gjaldmiðill heldur hlutabréf í óstofnuðu fyrirtæki sem á að heita Ísland Ohf.

2. Öll verslun fer fram með vöruskiptum.

3. Vextir eru ekki aðeins lagðir niður heldur bannaðir.

4. Verðtrygging verður afnumin svo og bæði stimplar og stimpilgjöld.

5. Seðlabankinn verður endurrreistur þegar fundist hefur Almannatengslafyrirtæki sem getur endurreist hann. Annars verður byggingin notuð sem félagsmiðstöð fyrir ungmenni í 101.

6. Við skorum á forstöðumenn trúfélaga að biðja fyrir íslensku þjóðinni og Davíð Oddssyni sérstaklega.

7. Sala áfengis verður bönnuð um óákveðinn tíma.

8. Þeir sem eiga afgangs flugelda í fórum sínum hafa þó leyfi til að fagna þessum ákvörðunum.

Stjórnin

Davíð hættur í Seðlabankanum

Höggmyndin: Davíð og Íslandsklukkan

Davíð Oddsson seðlabankastjóri hefur sagt starfi sínu lausi frá deginum í dag að telja.

Á morgun tekur hann við nýju starfi sem forstjóri Osta- og Smjörsölunnar."

"Ég hef að vísu ekki hundsvit á osta- eða mjólkurframleiðslu," sagði Davíð í viðtali við fjölmiðla. "En ég bý til nokkuð góðar smjörklípur."

Hér er höggmynd úr smjöri sem Seðlabankinn og "sponsorar hans" fólu hinum heimsfræga Ólafi Nerdrumsen að gera af Davíð í þakkarskyni fyrir "störf" hans.

Pólitísk yfirlýsing

Pólitík yfirlýsing vegna fyrirspurna um stjórnmálaskoðanir mínar:

 

Uns annað verður ákveðið styð ég femínista í baráttu sinni fyrir jafnrétti.

Einkum styð ég erlenda femínísta sem búa í löndum þar sem femínisminn er skemmra á veg kominn en hér á landi.

 

Ég styð líka fátækt fólk, fatlað, útlendinga á Íslandi, sérstaklega þá sem ekki eru norrænir í útliti, stöðumælaverði, listamenn sem ekki eru búnir að meika það, börn sem er strítt í skólanum - og umfram allt börn sem ekki njóta jafnra lífsgæða og önnur börn á Íslandi gera - og eiga að gera. Ég styð líka sérvitringa af flestum sortum, en það er dáldið annað mál, sem kannski ekki á heima í þessari yfirlýsingu.

 

Í aðalatriðum styð ég þá sem þurfa á stuðningi að halda, og er á móti þeim sem geta veitt stuðning en gera það ekki.

 

Svo væri ég hrifinn af stjórnmálamönnum sem hugsa meira um kjósendur sína en eigin hag ef ég sæi þá einhvers staðar.

 

Höfuðið á mér er mjög hægri sinnað en hjartað er vinstra megin og frekar róttækt.

Gore funheitur í leitinni að "weapons of mass destruction"

Gore gistir í snekkju Saddams á Íslandi

Nóbelsverðlaunahafinn Al Gore mun gista á snekkju Saddams Hussein á meðan hann dvelur á Íslandi í næstu viku.

Nú er verið að búa um rúmin í ferjunni, en síðan munu íslenskir friðargæsluliðar kallaðir heim til að leita að "gereyðingarvopnum" eða "weapons of mass distruction" um borð, því að eins og allir vita hafði Saddam sálugi það fyrir sið að skilja slík vopn aldrei við sig.

Nýjar Efnahagsaðgerðir : Aðstoðarmenn ráðnir

Nýjar efnahagsráðgerðir munu vera í burðarliðnum hjá ríkisstjórninni sem verst allra frétta þótt hún viðurkenni að hafa heyrt minnst á orðið "kreppu" oftar en einu sinni á undanförnum dögum.

Eftir því sem heimildarmenn Eyjunnar komast næst verður öllum sem geta sýnt frá á meira en milljón króna tekjur á mánuði (e. skatt) nú heimilt að ráða sér aðstoðarmenn og konur og mun ríkið borga launakostnaðinn.

Þessi efnahagsaðgerð kemur réttlátlega niður. Þeir sem eiga peninga fá nauðsynlega aðstoð. Þeir sem eru atvinnulausir fá nauðsynlega vinnu.

Gert er ráð fyrir að um 5000 aðstoðarmenn verði ráðnir á næstu dögum. Umsækjendur um aðstoðarmannastörf þurfa að framvísa flokksskírteinum frá viðurkenndum stjórnmálaflokkum eða erfðamengi sínu og forfeðratali frá DeCode.

Ný tæki við lögreglurannsóknir

Innlent | Morgunblaðið | 1.4.2008 | 05:30

"Meirihluti telur refsingar of vægar

Mikill meirihluti fólks telur að afbrot séu mikið vandamál hér á landi, að því er fram kemur í nýjum þjóðarpúls Gallup. Þannig telja 72% aðspurðra afbrot mikið vandamál, 16% að þau séu lítið vandamál hér á landi og 12% taka ekki afstöðu."

Dómsmálaráðherra, Ríkislögreglustjóri, sérsveitarmenn, margvíslegir eftirlitsmenn og fulltrúar öryggisdeildar lögreglunnar og pólitískt skipaðir dómarar hjá hæstarétti og héraðsdómi íhuga nú hópferð á sýninguna "Refreshing Torture For Modern Times" sem haldin verður í sumar í húsakynnum sem áður tilheyrðu Spænska rannsóknarréttindum.

Einnig verða á sýningunni margar skemmtilegar gerðir þvagleggja, piparúða, hnúajárna og auk þess gaddakylfur sem hafa gefist vel við að smala fólki heim á nóttunni.

Reynt verður að koma tækjunum í gagnið áður en lokadómur verður kveðinn upp í svonefndu Baugsmáli.

Allt sokkið til botns - leyndó í undirbúningi

mánudagur, 31. mars, 2008 - 16:53

Geir: Botni vonandi náð - “margt athyglisvert í undirbúningi”

"Geir H. Haarde, forsætisráðherra, sagði ánægjulegt að krónan hefði styrkst nokkuð myndarlega og hlutabréfamarkaður sömuleiðis á fyrsta viðskiptadegi eftir ársfund Seðlabankans og sagði hann það benda til þess að botninum í falli krónunnar og gengja hlutabréfa sé náð.

Hann sagði einnig að ríkisstjórnin og Seðlabankinn væru með “margt athyglisvert í gangi og í undirbúningi” sem ekki væri hægt að segja frá strax." Ligga, ligga, lá! Nanana búbú!

Dagpeningatúrar í 16 mánuði eftir hjá Samfylkingu

Innlent | mbl.is | 31.3.2008 | 19:31

Litlar breytingar á fylgi flokkanna

“Litlar breytingar eru á fylgi flokkanna í nýjum Þjóðarpúls Gallup, sem sagt var frá í fréttum Útvarpsins. Fylgi Sjálfstæðisflokkurinn mælist 37% en fylgi Samfylkingarinnar mælist 33%, 2 prósentum minna en fyrir mánuði. Ríkisstjórnin nýtur stuðnings 70% kjósenda.

Fylgi VG mælist nú 17%, Framsóknarflokksins 8% og Frjálslynda flokksins 5%. Fylgi Íslandshreyfingarinnar mælist varla.”

Athygli vekur þó að fylgi Samfylkingar minnkar um 2% á einum mánuði. Bendir það hugsanlega til þess að kjósendur vænti þess að Samfylkingin “geri eitthvað”.

Miðað við 2% fylgistap á mánuði geta dagpeningatúrar Samfylkingarinnar haldið áfram í 16 mánuði til viðbótar.

Myndin er af Sókratesi þegar hann átti 16 mánuði eftir ólifaða. Takið eftir hvað hann var brattur að sjá.

ATH: ÞEGAR þetta var skrifað var einkaþotutímabil Ingibjargar ekki hafið, og útreikningar um að fylgi Samfylkingarinnar dygði fyrir venjulegum dagpeningatúrum í 16 mánuði reiknað samkvæmt þeim tölum sem þá lágu fyrir. Mjög óljósar einkaþotuupplýsingar er hægt að nálgast í augnablikinu og hljóta því framtíðarspár um hversu lengi fylgi Samfylkingarinnar endist úr þessu að vera óljósar samkvæmt því.